Rom 9 | BEF | STEP | Nani lusiga nolube. Nani Kilisitohi bona'a nohuto'ni faga menolube. To Hu'mamofihi Sikalafu'uba komopa'nigu nomina'auba lusiga nolane luto ai nelepi'ehina.

Romans 9

Hu'mau Yuta bona'i enele'mo ho ti'ehinamagi yabe

1 Nani lusiga nolube. Nani Kilisitohi bona'a nohuto'ni faga menolube. To Hu'mamofihi Sikalafu'uba komopa'nigu nomina'auba lusiga nolane luto ai nelepi'ehina. 2 Ya'ma Yuta bona'magi nani'ni bona'i nehago enali kumu sipi laga'ni nebesigo nani keke'i lu epolobe. 3 To Hu'mau enele'mo bati huloto to nani enali kumu yabe luto gumi'i nohoto Kilisitotogati nele'mo loko hulenogo, bati huto yabe nolube. Hena'mugope? Hu'mau ya hu netolenogo Yuta bona'ni enubuto bilibe luto bati huto yabe nolube. 4 Hena'mube? Enali Hu'mau enele'mo ho ti'ehina bona'i nehabe. Ai enali'i mehuba hina'a pana'ni nehabe luto to sipi fana meha'agu enele'mo molo'ehina. Ai agoya hu niminogo'ni kaba hu lepalalube ya'ma kaga luto lu molo'ehina. Ai ana huto keya ka lu epito molo'ehina. Enali Hu'mamofihi gi'a liyafa huse hapa lamana'a keheli'ahana. Ai enalitoga alihi le'mo huto hilina ka hetofana lu molo'ehinamofihi kehelite li'ahana. 5 To koyapa'i enali Hu'mamofitoga komopa'ani mele'ahana tatatigihi naga'aniguti huto hi'ahabe. To Kilisito ai gufa'a hiti bo nohibe luto ana huto Yuta bona'i naga'aniguti huto hu'ehina yabe. Ya hu'ehinagi lali Hu'mau asaga kaba hu'ehina botimo liyafa huba huba nohunagihe. Ma'naka yabe.

6 To ya huto ni'igo Hu'mau bona'magihi kaga molo'ehinana huto mehu'ehina nolufihe? O'e, ya melu'ohube. Hu'mau Yuta bona'magihi asaga'i enele'mo nupa huloto enali naga'i folaganuguti bona'a mone'a fuku lu'ehina. 7 To ana huto Abalahahi yagapana'amagi asaga'na Hu'mamofihi bona'a menehabe. Koyapa'i Hu'mau Abalaha ma lu emi'ehina: Panaka Isaka ketalina yagapana'amagihi enalisigo kaika naga'i minalabe luto lu'ehina. 8 Ya'ma kaga hapa'a ma ni'ina, asaga Abalahahi yagapana'a Hu'mamofihi lusi bona'a menehabe. Hena'mube? Hu'mau Abalahahi pana'a moneko kumu kaga bebe sose ka molo'ehina yabe. To ya'ma pana'asigo ketalina yagapana'magihi enali'anigo Abalahahi lusi naga'i nehana yabe. 9 Ya'ma Hu'mau kaga molo'ehina ma ni'ibe:Kufu mone bulago lihaka Selau pana'i ketalinagi to ana kanagu aku'i alube a'nolube.

10 To ya'ma kagago meni'ibe. To mone hiti ana huto ni'ibe. Lepekau loe lae pana'i eteketo'ehina to enali afo'atitifu Isaka lali Yuta bona'magita tatatifu yabe. 11 Yata'a etali huto mehi'aha'igo to hapa'atiti hetofanafi sibinafi huto mehuse Hu'mau Lepekahi ma luto lu emi'ehina:Yege pana'uba gona'amofihi kele kele'i hu etalibe luto lu'ehina.Ya huto Hu'mau mone pana'amofihi hapa'a bu goto bati huto yabe luto le'mo ho ti'ehifihe? O'e. Ai foya'a ni'igo mone pana'a fuku luto nani bona'ni yabe luto li gehe li'ehina yabe. Hena'mube? Hu'mau ya huloto asaga bona'magihi li gehe li'ehinamu enelepilube'mu nohibe. 13 Ya'mu Hu'mau hu'ehinanamu'i mono bukugu fayahi ge'ahana:Nani Yakopu nibita hu'ehina pana'i yabe, luto to Isau hapa'a laga'ni menebesigo nemegesa'ni emi'ohube luto Hu'mau lu'ehina yabe.

14 Ya huto ni'igo lali Hu'mamofihi hapa'a bati mehu'ehina yabe lilupi? O'e, ya menolune. 15 Koyapa'i ai Mosehi ma lu emi'ehina:Nani nibita hilina bonatoga hetofana hu etalube to nibita hilina bonatoga niginaga filugi nani ya'ma foya'ni ni'ibeluto Hu'ma ya luto ligo ai yalo li gehe lilata nohibe. 16 Bona'i moneuba: Nani hetofana hulata nohube lula to Hu'mamofihi bona'a minalube luto lilinamu'i Hu'mau ana bomo le'malifiye? O'e, ya mehilibe. Bona'i foya'ani meni'ibe. Hu'mau enele'malina ai'asigo foya'amo ni'ibe. Ai ekesa keheliloto bona'mofihi ginaga fi emilata nohinamo ya'ma anasi ni'ibe. 17 To Hu'mau koyapa'i sipi bo Felohi lu emi'ehina ka fayahi ge'ahana:Nani Iyipi melugu sipi bo'ani henabe luto kele'mo ho ti'ohube? Sipi kaba bo lolo hu keto'ohunogo alipo sibina hiluna kanagu amuya'ni enelepilube'mu nohugo asaga noto noto bona'magi bu gelete nigi'ni liyafa hilabe luto lu'ehina yabe. 18 Yamu'i lali Hu'mamofihi hapa'amu ma keheli'ohuna, ai bona'i mone'a kumu niginaga filube luto to fato bona'i mone'mofihi komopa'a fi hekini lo etalube luto lu'ehina. Ya'ma ai foya'a ni'ibe.

Hu'mau ka epeki'ehina'a hiti to fuluna'a hiti ni'ina

19 To lenali bo moneuba ma luto lu nimilibe: Hu'mau ai'a mone bona'mofihi ekesa fi hekini lo etago aku henabe luto ana bomo fisa ilina'mu yabe? Ai ya hu etoloto henabe luto ka emekilibe? To kiyi'afu Hu'ma ekesa keheli'ehina'amofihi be ligilibe? 20 O'e ya melubo. Kai Hu'mamofihi kagalo nona'a emilata bomo kiyi'afu kele'mo ho ti'ehibe? Bona'i moneuba me somomo lolo hu su holenogomo somomouba: Kai henabe luto ma huto lolo hu neto'ahane luto lilifiye? Ya kaga melilina'mu yabe. 21 Ya'ma somo lolo hilata bouba ai'amo ekesa keheliloto me'mo i pata putu huto mone nose'na somo lolo hilina to mone heletuya somo lolo hilina ai foya'a yabe.

22 To Hu'mau yana suhi huto hu'ehibe. Ai foipa bona'i enipakafa enahalina hiti to amuya molo epalalina hiti enelepinogo kehelilabe. Yana'mu ka epeki'ehina bona'magihi ma'asi enahalinamofihi fulu huto minoto komopa'ani i gelehe hilana'mu enegeba huto mino lito bu'ehina. 23 To bona'i mone'amagihi fana meha'agu enele'mo moloto keke'i lu epoloto minalina ana huto ai foya'a yabe. Ai ya huto lalimo Yuta bona'magitogati fegutoga bona'magitogati mone'a kehe ito lele'moto fuluna'a limito komopa'a lalitoga fi limi'ehina. To henabe lutobe? Asaga bona'magi ai'a fana meha'a sipina ni'ina'mu enali kehelite fokehi lilabe. 25 Koyapa'i kaga lu yege hose bo, Hosea ai mono bukugu anamu'i ma koyo'ehina:

Bona'i fato'na nani'ni menehana'a
nani'ni bona'ni yabe luto ya lilube.
To fato metoga bona'i mone'a
menebesi'ehina'a
aku niginaga fi epilube luto
ya lilube.

To mone melugu bona kumu,

lenali bona'ni menehabe luto

yata'a lu'ehinago

aku analo enali kumu

Hu'mau minoba minoba hu'ehina bo,

ai'a yagapana'a nehabe luto

ya lilibe.

27 To lu yege hose bo, Aisaiyau Isilaeli bona'mu ma lu'ehina:Ya'ma Isilaeli bona'magi kehe'i suhi huto samahi tite nehinogo Hu'mau folagaha'aniguti bona'i mone'a nesi'asi enubuto bilibe. 28 Hu'mau asaga noto noto bona'i foipana nehanamu'i nona'a mele'isi epi su halina'mu yabe. 29 To ya'ma suhi luto koyapa'i Aisaiyau mone hiti mono bukugu koyoto ma lu'ehina:Sipi Botiuba amuya hiti nohuto lali asaga'i loho su hoto mone'amagita keke'i melitita lali Yuta bona'magita asaga'i fenene hutita'mu yabe. Koyapa'i Hu'mau Sotomu hepalo to Gomola hepalo bona'i enahago fili su he'ahana yana suhi luto lali filito fenene hu su hotita'mu yabe.

Isilaeli bona'i keya kalo mege'i melelata nehana

30 Ya'mu lali hena kaga lilune? Ya'ma nokehelune. Fegutoga bona'magi Hu'mamofihi bulo bebe sose foya melilata nehana, enali Hu'mamofitoga keheli ule'ale hilata nehago ai enele'mo bati hu'ehina. 31 Yuta bona'i koyapa'i Hu'mau enele'mo ho ti'ehina'amagi enali keya ka kehelite mege'i melete Hu'mamofihi bulo bebe sana bona'i nohune lite enubuto bilinamofihi kapo'a sa sa nehite bu mege'ahana. Ya yagi Hu'mau enele'mo bati mehu'ehina yabe. 32 Henabe lutobe? Enali keya kamofihi foya'a liba liba hite aku Hu'mamofihi keheli ule'ale mehi'ahana. Enali ya hite mone sipi efatoti figana futite he kete ke'ahana yana bona'i suhi lite mine'ahana yabe. 33 Hu'mau koyapa'i Yesu kumu suguna ka luto ana efapomu'i lipoti lu epi'ehina'mu mono bukugu fayahi ge'ahana ma ni'ibe:

Bu galo.
Nani Yuta bona'magihi Yiona hepalugu
mone sipi efahi nomolobe.
Enali efatoti figana futite,
he kete enahalibe.
To bona'i luga'amagi aitoga
keheli ule'ale hilana,
enali lesa'ani melise
enofokehi lilabe.